PASAMBAHAN
Si Alek :
Sungguahpun sutan saurang tampek ambo manibokan buah pasambahan,alah sarapek baliau angku nan tuo,pangulu nan bakarapatan
Sah dibilang diatok gala,indak katabilang ka pa atok gala samparono sambah..jo sambah juo dimuliakan kaharibaan sutan
Sambah nan kadihanta,titah nan kadipuhunkan kaharibaan sutan,tantang dimalam samalam nangko,pihak dihujan nan bapuhun,pihak dipaneh nan barasa atau karajo nan bapokok,silang nan bapangka,alah dihari dirantiahkan,gunuang tinggi disangko randah,baban barek disangko ringan,nan indak alah diadokan,nan matah alah bamasakkan,nan taserak alah bakampuangan,Allah rasonyo kamambari.
Hari baiak kutiko elok,pintak nan pangka sadang kabalaku,siriah lapeh panggilan datang,jauah hampia kamilah datang,niniak jo mamak bamuliakan,langkok jo cadiak tau pandai,alah kasanang paratian.
Janjang nan alah kami tingkek,bandua nan alah kami damiak,lapiak takambang alah bakaduduak i alah kusuik siriah dicarano,timbakau baguluangpun alh baisok.Pihak dijamu basa nangko,dibilang minum alah baramaik sajuak,dibilang makanpun alah baramaik kanyang,alah salasai kaduonyo.Niatan suci di nan pangka,mukasuik sangajo alah sampai,apo nan di ama alah pacah,hijab jo kabul alah samparono.
Limbak nan daripado itu,pihak dibadan diri kami,bukakkan pintu dinan pangka,nan hampia mintak ditahani,nan jauah mintak dilapeh jo hati nan amaik suci,jo muko nan amaik janiah,turun dijanjang dinan pangka,jan cacek maro malintang,jalan nan jauah kakami turuik,sawang nan indak bapagantuangan,doakan bana sampai-sampai,masuak kakorong kampuang kami,taruih karumah masiang-masiang.Silaturrahmi jan naknyo putuihnyak kuek jambatan baso basi nyak kuek hati nan tahubuang.Dibaliak itu balaia kapabudi,luluih dalam galombang hiduik damai.

Si Sipangka :

Silaro jatuah jo bungonyo
makanan ikan dalam tabek
tasirok darah di dado
tandanga himbauan dari si alek.

bari ba junjuang gagang siriah
dibasah kapua bueklah sadah
gambia kuniang bak tanah liek
pinang banamo pinang mudo
timbakau nan datang dari medan
diguluang timbakau jo karateh
iyolah rokok urang namokan

rokok sabatang balunlah habih
siriah sakapua alun di kunyah
tadanga himbauan si alek
tasirok darah didado
goyahlah sagalo pasandian
hati nan arok arok cameh
tadanga sambah kabakeh si pangkalan

maa... sutan
balam tabang , barabah mandi , barabah mandi dimuaro
salam pulang . samabah kumbali ka mulonyo.

Sungguah sutan surang tampek ambo mangumbalikan buah parsambahan. Alah sarapek baliau angku nan tuo , panghulu nan bakarapatan.
Usah dibilang di atok gala, indak ka ta bilang ka ta atok gala, namun sambah jo pasambahan juo ambo anta ka haribaan sutan.
Pasambahan nan ka di anta sampai kaharibaan sutan , iyolah tantangan sahari nangko , pihak di hujan nan bapuhun , pihak di paneh nan barasa , mulo hari di gantiahkan , baban barek di sangko ringan , jalan jauh disangko dakek. , gunuang tinggi disangko randah , pintak bak raso lai ka buliah kandak bak raso ka balaku.

Hari nan baiak alah tibo, kutiko nan elok pun alah datang , siriah lapeh panggilan datang, jauh ampia alek datang, imam jo katik bamuliakan sarato cadiak pandai , langkok basa jo panghulu.
Diateh itu pulo pihak juadah katangah pun alah baparenahi , makan panghulu alah baraso kanyang, minum pun baramaik sajuak.
Limbak nan dari pado itu tarabik kato dari baliau nan tuo , niniak jo mamak.
Kok duduak nyak maurak selo , tagak nyak ma asak langkah , minta bamohon ka tampek masing2 , mintak di lapeh jo hati nan suci, muko nan janiah saratojo muluik nan amat manih.
Kan baitu bana buah panitahan sutan nan katangah.
Sabanyak buah panitahan sutan nan tahanta alah manuruik adat nan bapakai , manurik cupak nan ba isi .
Akan tetapi samantang pun baitu , adat duduak jo nan tuo, limbago duduak jo na tahu, nan tuo lai taradia, panghulu lai kacarano, lamak kato balega bunyi, lamak siriah lega carano. Di bao kato jo baiyo, di ambiak ka angku nan tuo , panghulu nan bakarapatan sarato niniak mamak, sifat mananti sutan sakatiko.
Lai kadalam adat kato nan baitu sutan.